Mer hatte drop gewaadt: Et neue Johr fing aan wie et aale ophoot:
Wat maache mer mem Breslauer Platz un mem Busbahnhoff?, heeß et em Rod.

Av JANEWAR dürfe mer en Kölle eckersch noch met rude, gääle und gröne Plakette fahre. Bloß ganz aale Blechkeste, die met nem „H“, die dürfe komischerwies ohne die Dinger fahre.

En Roggendörp satz der Jürgen Rüttgers mem Uhlenberg e paar Bäum nevven de Stroß. En Lövenich och, do han se en neu Stroß gebaut, domet hä ovends fröher kütt noh Hus.

Bei der Proklamation hatt unse OB dä „Kamele“ ens durch de Blom Bescheid gesaht. Hä hätt denne noch an der Kopp werfe solle: Liebe deine Stadt! Hä hät dat ävver god gemaht!  

Der Meisner leet ens widder jet vun sich hüüre: De Kölschmesse woodte „reglementeet“. Der Kölsch-Messe-Baas Hans Fey mäht dat ävver och ald zigg Johre esu, wie et sich gehööt.

Der Henner Berzau, der Puutedokter, storv. Hä hät en Hääd kölsche Leeder geschrevve Un hatt uns mem Uschi Werner-Fluss vill Freud gemaht em Levve.

Et Dionysos-Mosaik woodt wigger repareet, dat sollt noch et ganze Johr doore.
Hoffentlich kütt nit widder eine, dä dodrop danze well. Dann gonn mer ävver nit mih zoloore!

Do freut sich ens widder der Hansgerd Hellenkemper, dat hatt im Spass gemaht: Sing Junge hatten am Kurt-Hackenberg-Platz en Deil vun der Römermuur freigelaht.

Ne Marokkaner-Fent soll en Kalk eine üvverfalle han un woodt vun däm erstoche. Dat dät uns jo Leid, ävver üvverfalle, esu jet darf mer och nit maache.

Em kölsche Foßball wollten se jetz durchgriefe:
Et woodte luuter mih Schiedsrichter zerschlage, dat muss mer ens begriefe.

Wat wor dat en Wahn ? Woröm kräht der Rüttgers singen Wittke nit en der Greff? Die Flogzeuge en der Naach sin för de Gesundheit vun dä Lück die do wonne Geff.

Der Fastelovend fing aan met fiesem Knies:
Kahlens Guido maht uns de Volkssetzung mies.

Dä wollt nit mih, dat mir met „Alt Kölle“ om Nüümaat feere.
Em FEBRUAR krähte doför de Rude, de Gröne un de Linke Füür.  

Beim Funkebiwak woodt deswäge met schwatze Pappnase demonstreet.
Mer han doch ald zigg achzehnhundertdreiunzwanzig om Nüümaat gefeet.

Dä Zoff schlog sich och em Rusemondagszog widder geballt:
Kuckelkorns Chress hatt en Gilliutin mem „Boritz“ un „Mörschel“ op ene Wage gestallt.

Üvverhaup wor vill fresche Wind em kölsche Fastelovend: „Ganz schön kess, die junge Garde vum Fesskomitee“ heeß et am Rusemondagsovend!

Naachs wore dann och de Heinzemänncher widder do en fließiger Aat:
Rusedinsdagmorge stundt op eimol dä „Gilliutine-Wage“ wie vun selver om Nümaat.

Wäge däm Stööz hatt sich et Fesskomitee för 2009 jet Himmlisches enfalle looße. Et Bärb un der Määtes krähte naachs en Eingebung vum Herrgodd, de Finger dovun ze looße. 

Äschermettwoch bei der Staatsanwaltschaff!
Ävver nit nor die, ganz Kölle wor baff:

Zwei Richter hatte zwei Intensiv-Schlagdrops nit en de Blech gescheck.
Eine dovun wor dodrop tirre gegange. Die Ampsrichter hatte nit durchgebleck.

Wat es bloß met dä kölsche Juriste los?
Dat hält mer doch em Kopp nit us!

Die sin met schuld, dat et luuter mih Verbreche gitt!
Die weede eesch wach, wann selvs ens eine von inne üvverfalle weed.

Och Bewährungsurdeile fungke mer nit god. 
Die Verbrecher laachen sich üvver ihr Strofe kapodd!

Mer waade dodrop, dat dä Pipi-Aufzog an der Domtrapp usgedeent hät,
Gitt et demnächs nen AB, dä küüt us der Ääd?

Winkelhogs Bäätes hatt sich dä bei de Kiesköpp aangeloot.
Wann mer ävver do met der Fott em Freie stündt, dat wör nit god.

Schaefers Hanns spendeete dem neue Kolumbamuseum en Lind mem Name för 5000 Euro; Sage mer dann späder ens „Hanns Schaefer in den Trümmern“ dozo?

Et wor ens widder nen Spanier klevve geblevve an der Idiotebröck.
Villleich hatt si Auto wäge singer Ladung Autoreife ze ärg gehöpp.  

Em W-R-Museum wor e ganz düür Bild op eimol en ganz bellige Saach.
All hatte mer gegläuv, et wör nen Monet, dat hatte mer ävver och nur gedaach.

Vörm Rodhuus hatten se beim Buddele e paar hundert Farina-Fläsche gefunge.
Otts Jochen setz jetz em neue Ben-Wisch-Glas-Huus met singer SPD-Junge.

Sin mir hee en Kölle eigentlich all beklopp?
Em Stroßeverkehr gingken ald widder mih Lück leider drop!

Steffenhagens Klös stöhnt: „Wat es bloß met dä Kölsche loß?“
Jede Jeck meint, hä wör allein op der Stroß.

Besonders vill Raddfahrer un Lück zo Foß nemme kein Röcksich mih op de Ampele. Denne es et dressegal, ov andere dobei verunglöcke.

Hurra! Em MÄÄZ maht der Lommi widder op! Glitschers Frank es jetz do der Baas. Et gitt widder die decke Karmenade (Kotletts) un Päffgen-Kölsch us der Friesenstraß.

Jetz maht uns KVB Äänz: Wä en der Stroßebahn met Möll erwisch weed, muss berappe. Ävver do hatten se tirek e Problem: Wie nämlich funktioneet dat Ertappe?

Medden em Mont do platz en Bomb bei der CDU!
Mer hatte gedaach, en dä Partei wör endlich Ruh.

Reinarz’ Walli hatt der Beddel hingeschmesse!
Hatten e paar im engeredt e schläch Gewesse?

Se han im vörgehalde, KVB- un och noch CDU-Baas, doch wör nit mih ze maache. Su dät hä och zo vill verdeene; dat wor för der Walter dann nit mih för ze Laache.

En Explosion gov et och en Worringen; ävver dat wore richtige Flamme.
Do kräht och der Stephan Neuhoff Kadangs un reef 1200 Feuerwehrlück zesamme.

Der Dokter Heinrich Heinen wor gestorve, der Baas vun der Rundschau.
Hä wor för si Huus, för aal Lück un för uns kölsche Kirche luuter en Unrauh.

De Frau Dombaumeisterin dät Bohrkään us dä decke Brocke ungerm Dom verkloppe. Dat woren en ganze Rötsch Stein. Hoffentlich kütt jetz uns Dömche nit aan et kippe!

Pooschmondag feel „Rund öm Kölle“ en der Schnei; dä ärme Artur Tabat!
Ävver Schrammas Fritz versook, im demnächs ze helfe för widder op et Radd. 

Nord-Süd-U-Bahn un kei Kosten-Engk: Baue mer demnächs am Rhingufer noch en Bröck? Wä soll dat bezahle? Dat Ganze soll jo schön weede, es ävver och verröck.

E paar Hollywoodgröße han nen Film gedrieht,
Beim Gerling om Gereonshoff, dat wor nit verkeht.

Jet godes för de kölsche Ökonomie Aanfang APREL:
Uns Bundeskanzlerin, et „Ängie“, wor mem Rüttgers beim Ford en Nehl.

It hatt uns gelov: Kölle wör Deutschlands „Vörzeige-Autostadt“.
Der Dokter Rüttgers wor dobei vör Freud üvver et „liebe Angela“ platt.

E bessche Knies gov et bei der Opferhilfe, hatt de Zeidung gesaht.
Schrammas Fritz un si Ooschel hatte dat ävver flöck beigelaht.

Neuerdings däte Klaumanese en der Stadt ald uns iesere Möllemmer avklemme.
Deswäge litt noch mih Möll en de Stroße eröm. Op wat vör Idee die all kumme!

Jet Neues: De CDU hatt mem Jürgen Hollstein ne neue Baas.
Hoffentlich fällt hä en der Partei un met singem Segelfleege nit op de Nas.

För uns Kölsche gov et jet för ze Loore: Der „Schneesturm“ kom der Vatter Rhing erop! Et wor uns neu, dat et om Mond och schneie kann. Do kome mer wäge dem „Buran“ drop.

Öm uns Uni’s es et ärg schläch bestallt,
Do fleege de Lampe vun de Decke, hatten se uns verzallt.

Et dröpp durch de Däächer en de Klasse ganz apaat.
Ävver su han uns Studente villleich derheim et Wäsche gespart.  

Beim Grönflächenamp hatten se en Rötsch Rasemäher kapodd un düür neue gemeedt. Fritzemann kundt inne jo met singem Mondeo ushelfe, dann kräht hä dodrunger e Metz. 

De Gröne un de Rude üvverlahte, e Stöck neu U-Bahn ze baue un späder widder avzerieße. Dat hälds de doch em Kopp nit us, dat es doch för ze ....... zum Bebaumölen!

De Haie hatten et nit geschaff; jo un? Zweiter es doch och schön!
Dat sollt der FC eesch ens nohmaache, ävver Daums Chress speite bloß decke Töön.   

Üvverraschung: Em MAI kunnte mer dem FC dann doch noch grateleere!
Jetz brohte mir kölsche Foßball-„Fachlück“ uns nit mih ze schineere.

Die Müüs hatten em letzte Momang noch de Kurv gekräge,
Der FC-Baas Wolli moot jetz dä Chress för ze Blieve bewäge.

Müll hatte mer op eimol ze basch en Nehl, dismol ävver bloß för ze Verbrenne.
Dä kom vun der Mafia us Neapel un mer kunnte jet dran verdeene.

Der Roncalli wor widder om Nüümaat
En singer aldbekannte schöne, dolle Aat.

Wäge uns Oper un dem Schauspillhuus krähte mer Kopping wäge dä Zahle.
E Provisorium woodt gesok; sechsundressig Millione! Wä soll dat bezahle?

De Trapp en Düx weed och dubbelt esu düür!
Do leever Godd; do wähßelten e paar Beamte de Klör.

Angs hatte Schaefers Hanns un de Lück em Veedel vun Gereon,
Dat die schön, aal Kirch ungergeiht wäge drömeröm dä Neubaukrom. 

Wat wor dann do en Chorweiler mem Lierenfeld loss?
Dem Schäng Drickes sahten se: „Mach endlich Schluss!“

Do kunnt mer draan rüche: Der Ex-Baas vun der Sparkass maggelte mem Staatsanwalt. Hä hatt sich frei gekauf un ne Püngel Euro us singer Portokass bezahlt.

Ald widder wore zwei Tronsüüle unger der Idiotebröck hänge geblevve,
Höört dann dann nie op? Denne mööt mer en klein Bröck op der Brell klevve!

Der schöne Mai hoot op met enem Schock für normale Lück nit nor en Kölle:
Dä Komaschläger woodt frei gesproche; dat gläuv keiner, wann mer dat verzälle!

Jo, wo sin mer dann hee? Dä Kääl gehoot fünf Johr en de Blech!
Weil mer der Kopp geschöddelt hatte, schannte de Gereechte och noch met uns, ävver ech!

Wie och der JUNI aanfing: Der Pastur Meurers Franz woodt an der Kirch üvverfalle. Jetz gonn die Verbrecher ald an de Goddeslück draan! Et mööt bei nem Reechter ens knalle!

Schüttes Dieter vun der Zeidung, der esu vill för Kölle gedon hät, woodt fünfunachzig. Hä hät dat op Sylt met sing Fründe gefeet, do es de Luff besser un nit esu schmuddelig.

Uns Oper sollt noh Müllem en et Palladium.
Bliev dat jetz bei däm Provisorium?

De Stadt wollt noh lang Zigg ens widder neu Lück enstelle; prima!   Vum Drachenfels erav deuvelte Schrammas Fritz mem Rod wäge däm „Regionale“-Klima.

Et eeschte Mol hatt uns Rodhuus för zwei Johre der Huushald fassgemaht.
Ov dat alles god geiht, han mer uns gefrog. En de Parteie hatten e paar Buchping gehatt.

Wat se ävver dann vörhatte, dat schlog doch der Boddem usem Faaß:
Der Rodhuusplatz sollt mem Jüddemuseum zopaveit weede! Dat maht jetz keinem mih Spass!

Gäge et Museum han mer jo nix, ävver do an der Plaatz fingk mer dann et Rodhuus nit mih. Dä Platz muss blieve wie hä es; uns un denne, die unse Fritz besöke, deiht söns et Odeme wih.

Die kölsche Rabaue weede luuter bekloppter, die han kei kölsch Gewesse:
Em Rhingpark en Düx hatten se jetz ald dat Kleinbähnche us de Schinne geschmesse!

Am eeschte JULI wor et esu wigg, och en de kölsche Weetschafte woodt nit mih geflöpp. Do kräht mänch eine en Kölle e lang Geseech, un vill krähte dat nit en ehr Köpp.

Endlich woodt et Dionysos-Mosaik fäädig. Hellenkempers Hansgerd hatt sich gefreut. Hoffentlich well nit widder einer drop danze. Der Hansgerd hatt dat ävver nit bereut.

Dat Palaver öm et Jüddemuseum ging och en diesem Mont wigger.
Mir Kölsche wolle dat op unsem Rodhuusplatz nit han! Stellt et doch ein Eck wigger!

Schäng Jülich un Jungs Neeres mahte vör Gereech Ex-Kripobaas Volmers Walli zor Sau. Wäge der Edelweißpirate hatt hä am Engk gesaht: Es god, Ehr hat Rääch un ich ming Rauh.

De Gereechte hatte jet geliert: De Beckendörp-Gängster moote en de Blech un sin am Hüüle! Woröm nit direk esu? Vörher mooten se flöck noch e paar Unschöldige verkamesöle.

En Kölle stonn de Ampele länger op Gääl wie woanders.Bei Rud gonn hatt noch keine gedörf. Meint der Harzendorfs Klös, mir Kölsche däte jet langsamer denke wie die in Düsseldörp? 

Nix mih met “People Mover”? Kritt uns gode, aale Rhingseilbahn demnöchs Konkurrenz? Weed dem Düxer Bahnhoff un dem Haupbahnhoff en Seilbahn kredenz?

Uns Motto-Queen, et Nikutas Marie-Luise, woodt sibbzig.
Et hät uns ald vill Freud gemaht! Mädche, bliev noch op der Bühn bis nüngsig!

Die Qualmerei en de Weetschafte ging wigger. Jetz hatte all Weete nen Raucherclub. Sin mer hee en Schilda? Üvver dat Nichtraucherschutzgesetz schöddelte mer der Kopp!

Och em AUGUSS zänkte mer uns wigger mem Rod üvver der Rodhuusplatz.
Wasser op uns Müll: De Archäologie woodt ald öm de Hälv düürer jetz.

Hellenkempers Hansgerd un sing Junge hatte am Vringspöözche e aal Schlösselloch gefunge. Dodrüvver freut sich och der Schäfkes Neeres; dä darf dat demnächs en si neu Museum stelle.

Freue kann sich och der Lindlars Hans Pitter op singen Neubau an der Gereonstroß. Hä muss dann am Dag nit mih noh Sieburg jöcke; för sing Junge ze besöke, geiht hä zo Foß.

Als Regierungspräsident moot hä dem kölsche Rod ävver ens ööntlich op de Fingere kloppe. Beim Duppelhuushald will de Stadt noch mih Grosche usgevve anstatt de Löcher ze stoppe. 

För die Rhingtrapp op der Schäl Sick wollten se dä aale Bahndamm avrieße.
Dat uns KVB Puute Graffiti spraye liet, doför künnt sich Schaefers Hanns en de Fott bieße.   

Hä kräht vum Rüttgers Jürgen der Verdeensorden för si Levvenswerk hee am Rhing un och sugar et Kommandeurkrütz vum polnische Staatspräsident. Dat wor fing.

Et unendliche Müllpalaver es baal am Engk. Der Heugel un der Rüther moote nit en de Blech. Winkelhogs Häbäät schreev „Abfall“ op de Müllemmere för die, die der Müll fallelosse frech.  

De SPD un de Gröne scheckten der Roters’ Jürgen en et OB-Kandidate-Renne.
Als Ex-Regierungspräsident un Ex-Ober-Blö sollte mer dä als OB nit verkenne.

Schrammas Fritz bützten en China et Heidemanns Gold-Britta.
Wann dat si Ooschel en der Äugelskess gesinn hatt, kräht hä doheim ävver Gewitter!

Dem Lampes Beatrix vun der Zeidung wollt ich grad jet schrieve,
Do hatt et hee en Pesch geknallt un ich kunnt nit setze blieve.

En Sauerstoffleitung wor explodeet; Kääl, wat hatte mer uns do verschrocke! Dat wor jo villleich e Füür, un vun däm Qualm wore mer vun de Socke.

Schrammas Fritz kandideet noch ens en Zweidausendnüng, jetz wor et erus!
Dat wor för vill Kölsche en schöne Nohreech am Engk vum Auguss.

Die Junge vun Microsoft komen em SEPTEMBER am Rhing en Kölle aan,
Un Streitbergers Beenche wollt kei LED-Leech am Kranhuus han.

Die kölsche Raddfahrer lieren et nit, se jöckten wigger bei Rud üvver de Stroß.
Wie krige mer dat denne bloß beigebraht? frogten Steffenhagens Klöös.

Der Meisner un et Gloria vun Thurn un Taxis hatten e Boch geschrevve.
Do hatte sich ävver zwei zesammegefunge us verschiedene Levve!

Jetz woodten doch kein Unger-Pavei-Pipi-AB’s bestallt.
Wie die Fraulück die bruche künnte, hatte mer uns üvverlaht ald.

Wat mer ald immer wosste: en Kölle kann mer am Beste bütze.
Dat hatt eine geschrevve en enem Reiseführer för ze Bütze.

De Brunge wore opmascheet, der Heumaat hatt geziddert.
Vill Kölsche hatte jet dogäge, se föhlten sich aangewiddert.

Die linke Autonome hatte Schlägereie aangefange,
Dat wor dann Steffenhagens Klöös ze wick gegange.

Et woodt vill kapodd gemaht, en Rötsch vun Linke komen en de Blech.
De Demonstration woodt avgesaht, su kom keiner zu singem Rääch.

Uns Dömche woodt em OKTOBER met dausend neu Lampe aangestrohlt.
Deswäge hatten dann Feldhoffs Nobby un et Schock-Werners Bärb öm de Wett gestrohlt.

Dat wor e Beldche: e paar dausend Motorrädder stundte vörm Dom en Reihe aan. Die Junge hatte för ehr Kamerade gebedt, die jet ze flöck wore un nit de Kurv kräge han.

Dat hälts de doch em Kopp nit us, dat kann mer doch vergesse:     
Am Schokelademuseum hatten e paar Lück am Kran en der Luff ze Ovend gegesse!

Et Rodsscheff „Stadt Köln“ muss opkladunjeld weede; dot Üch ävver nit widder verzälle! Domols hatt et Wappen jo drei Krune, ävver nor zehn Flamme avkräge!

Hellenkempers Hansgerd freuten sich am Kurt-Hackenberg-Platz üvver de Betonschalunge. Dat wor ävver die vun de Römer, die wor denne god gelunge.

Blömers Richard un sing drücksehn CDU-Kamerade woren ens widder vörm Gereech. Et ging öm der unendliche Spendeschandal, ävver der Reechter verlor dobei si Geseech.  

Wann der DFB si Museum baue wollt om Breslauer Platz,
Kräht hä dat geschenk, ävver nit ömesöns. 

Ävver em NOVEMBER hatt sich vun denne keiner mih dodröm geresse,
Die kniestige Foßball-Baase wollten vun uns nix mih wesse.

Schaafs Otto hätt gään för sing StEB e paar Penning mih, die kräht hä ävver zeeesch nit. De Schwatze un de Gääle maahte dat wäge der Wahl nit met.

Grad hatt der Fastelovend aangefange un bei de Gesellschafte gov et himmlisch vill Knies. Am 11. em 11. hatt der Ostermanns-Baas Peter Schmitz-Hellwing sing Junge ävver em Greff.

För et Elternhuus am Kinderspidol sollt der McDonalds sich ävver jet schamme!
Die krähten doför us der Portokass grad noch e paar Euro zesamme.

Ne bekloppte Schweizer hatt Scheeles Jürgen wäge ner Breefmark verklag.
Et ging öm ganze zwei Euro; dat kunnt keiner mih begriefe, su en Saach.

Vier Verbrecher hatten en Vingst vör zwei Johr eine baal verbrannt.
Jetz woodten se lang en de Blech gescheck; dat hatten se nit gekannt.

Do hatt sich Schäfkes Neeres vum Stadtmuseum ävver gefreut:
Bilder üvver uns aal Kölle vum August Sander woodten opkladungeld. 

För der Ebertplatz moote mer dem Reinartz’ Walli ne neue Zollstock hinlange,
Domet hatt hä uns am Vringspöözche dann de „Decke Mädcher“ an der Chressbaum gehange.

Endlich hatt et Hedwig Neven DuMont der Ohren-Orden kräge; dat woodt ävver och Zigg! Et Angelika Rüttgers meint en der Laudatio, et Hedwig hätt för uns Ärme der richtige Bleck.    

Em DEZEMBER woodt der Kiegelands Hein et eeschte Ihremetgleed bei der IHK en Halle. Vun do kom dä Jung jo her un leet als kölsche Zeidungsbaas secher jet Kribbelwasser knalle.

Em kölsche Fasteleer gitt et dismol luuter noch an alle Eng un Ecke Knies.
Och de Appelsingefunke om Neppes han sich en de Hohr, un Schmidts Helmut öm sich bieß.

Hurra! De Figure am Rodhuustoon wore widder do! Un noch nit ens als „Mählsäck“-Mess! Hoffe mer, dat se kein Ress mih krigge, söns kritt der Rod die Ress!

Et Johr ging ze Eng wie et aangefange hatt: Wat maache mer mem Breslauer Platz? Dot uns dä Gefalle un setzt öm Goddes Welle kei neu blau Zelt an die Plaatz!

Mit freundlicher Genehmigung meines Bekannten © Helmut Schumacher